ليلة صعبة
كنت سهران في السوبر ماركت بتاعي
هو محل صغير كدا على اده في حارة ..بس في اخر المنطقه ..مطرف شويه ..حوالين مني كام بيت
وبعد مني منطقه زراعية كبيرة
الساعه عدت 1 بعد نص الليل ..ولقيت مراتي بتكلمني
وبتطلب مني اجيب بامبرز للواد وفينو وجبنه وانا جاي
قولتلها حاضر ..قفلت معاها ولسه بلم البضاعه اللي بره
عشان اقفل المحل
سمعت صوت خطوات بسرعه جايه ناحية المحل
الدنيا كانت ضلمه شويه
ولقيت ست في منتصف العمر وعلى وشها علامات
الذعر وهي بتتلفت وراها وحاطه ايدها على جنبها
وقالت بصوت ضعيف
لو سمحت ..
ايوه أؤمريني
ممكن استخبى عندك
نعم ؟
بسرعه الله لا يسيئك
في ايه بس
ابوس ايدك مفيش وقت
طيب افهم
هيخلص عليا ..دخلني بسرعه
هو مين
فجأة لقيتها جريت جوه واستخبت في ركن ورا شوية كراتين
ولسه بحاول افهم في ايه
سمعت صوت حد جاي بيجري ووقف قدام المحل والشر باين في عينيه وهرش في رأسه واتلفت يمين وشمال
وبعدها سألني
لو سمحت
نعم؟
مشوفتش ست عدت هنا من شويه
ست ؟
بصيت بعيني ناحية الكراتين ولمحت نظراتها
المرعوبه وگانها بتترجاني مفضحش امرها
بص لي وسألني تاني
مالك ساكت ليه
لا ..مفيش
مفيش ايه؟
مفيش اي ست عدت من هنا دلوقت
متأكد يعني ؟
ايوه ..ليه هو في حاجه
ملكش فيه يا عم انت
انت مين يا عم وايه حكايتك بالظبط
وانت مالك ..أنا سألت سؤال وانت رديت وخلصنا
ومن غير سلام كمان
وبعدها سابني ومشي وهو بيقول
هلاقيكي لو رجعتي لبطن امك ..هتروحي مني فين
بعد ما مشي واختفى من الشارع
روحت ناحيتها عشان اسالها
لكن لقيت على الأرض أثر دم ..ممتد لغاية الكراتين
مكان ماهي مستخبيه
قربت منها بهدوء وندهت عليها .
يا ست...اطلعي من عندك هو خلاص مشي و ..
لسه هكمل جملتي انصدمت لما شوفتها وهي ..
واقعه ع الأرض وغرقانه في دمها
حاولت افوقها
يا ساتر يارب
ايه الليله اللي مش فايته دي ..
جايالي منين انتي بس ..هتلبسيني مصيبه شكلك
حاولت افوقها لكني لقيتها قاطعه النفس خالص
وفي دم نازل من جنبها بغزارة ...بسرعه حطيت ايدي
عند رقبتها وجسيت نبضها لقيت لسه فيها الروح
حمدت ربنا ومسكت علبة مناديل وسحبت منها كام واحد وحطيتهم على مكان الجرح عشان احاول اوقف النزيف
واتصلت بسرعه على خالد صاحبي اللي بيته قريب مني
عشان اقوله يجيب التوكتوك بتاعه عشان نلحق نوديها
اقرب مستشفى ..
رد عليا ولسه بيقول
ايه يا صاحبي اخبارك
فينك يا خالد ؟
انا هنا في مشوار قريب منك
طيب انا عايزك ..لسه هكمل جملتي
لقيت حد واقف ورايا وشد مني الفون
وقالي
كنت متأكد انك بتكدب عليا
وضربني بلكميه في وشي
ورمي الموبايل ع الأرض
ساعتها وقفت بسرعه ومسكته من رقبته وخنقته
وذقيته بره المحل...لكن جسمه كان اجمد مني
مسكني من رقبتي ودفعني لجوه
وقعت ع الأرض ولقيته طلع سكين واتجه ناحية
الست اللي بتنزف وقرب منها وهو بيقول
مش قولتلك انا مش هسيبك
في اللحظه دي كنت مسكت ازازة حاجه ساقعه
وخبطته بيها في دماغه ..اختل توازنه
وبصلي بغضب وراح رفعني بايديه من رقبتي من ع الأرض
وانا بحاول افك قبضته من على رقبتي
ولكن غضبه مني كان أقوى من أني أفلت أيده
وصعبان عليا الست اللي بتموت دي
وحاسس اني مش عارف اعمل حاجه
وابتديت اتخنق والأكسجين يخلص
وبكح جامد وابتدت صوابعي تضعف وسبت قبضته
تتحكم وتضغط اكتر على رقبتي
وحسيت أنها النهايه ..لكن فجأة كان وصل صاحبي
وضرب الراجل من ضهره ..فلتني من ايده وقعت ع الأرض
واشتبك مع خالد وجريت انا اطمن ع الست
لقيتها بتنازع
مسكت حبل ولفيته على رقبته وشديته جامد
وخالد نزل فيه ضرب واخدنا منه السكين واتمكنا منه
وربطناه كويس في المحل وقفلت عليه واتصلت بالشرطه
وطلبت من خالد يشيل معايا الست وياخدها بسرعه لأقرب مستشفى ..
والحمدلله لحقناها بأعجوبه بعد ما كانت خلاص هتودع
ودا بعد ما اتبرعتلها بكيس دم مكان اللي نزفته
واتخيط مكان الجرح
والشرطه قبضت على الراجل اللي اتضح
أنه طليقها وفي مشاكل كتير بينهم
وهما من قرية جنبنا .. واستغل أنها لوحدها
مع بنتها في البيت واتهجم عليها
لكن قدرت تهرب منه لغاية ما جت لحد عندي
والقدر حطني قدامها عشان أنقذها
أهلها تاني يوم جم القسم شكروني بعد ما قفلنا المحضر
قولتلها لا شكر على واجب والحمدلله انها بخير
وربنا يطمنكم عليها .
حاولوا يدوني فلوس مقابل التلفيات في المحل
لكن قولت عيب تحاسبوني على خير عملته
انا اجري عند الله ..والمهم انكم تخلوا بالكم من بنتكم
ويتم شفاها على خير .
تمت
حماده هيكل
تعليقات
إرسال تعليق