قصة بعنوان القتل الرحيم
كنت قاعد ع القهوة مخنوق ومش طايق نفسي
بنتي اللي عمرها سنة وكام شهر سخنه وبتعيط
ومش معايا تمن الكشف ولا العلاج
مراتي قامت بالواجب وسمعتني كلام يسم البدن
بس هي عندها حق انا اصلا مش بتاع جواز
ومسئولية ..انا اناني ومستهتر ومش مقدر أن معايا
زوجة بنت ناس وطفلة ربنا رزقني بيها
اعتقد اني مستحقش كل دا وان واحد زيي المفروض يعيش ويموت وحيد ...مش بحب الشغل
بشتغل يوم وعشرة لأ .هوائي مدخن شره
عصبي وعصبيتي دي لا تحتمل
حاولت استلف من واحد صاحبي ..لكن قال مش معايا
ع الاقل عنده ذوق اتهرب بشياكه ..عكس التاني
اللي قالي لما تسد اللي عليك الاول
كل الابواب أتقفلت قدامي ومش عارف اجيب فلوس
منين ..انا محتاج فلوس بسرعه عشان بنتي المسكينه دي
القهوجي طلب مني الحساب
قولتله ع النوته ..قالي حسابك تقل يا عم
وانا اجيبلك منين دلوقت سيبني انا مش فايق لك
شدينا انا وهو مع بعض
اتدخل بينا واحد معرفوش
خلاص حساب الاستاذ عندي
انت مين يا حضرت وبأي صفة تدفع لي الحساب
قال للقهوجي خلاص روح انت وحسابه عندي
سابني ورجع مكانه ..روحت وراه وسحبت كرسي
وقعدت قصاده..هو حضرتك تعرفني ؟
تقريبا
يعني ايه ؟
كل يوم بشوفك بتقعد ع القهوة لوحدك وملاحظ
ان صحابك بيتهربوا منك
دا انت مراقبني بقى
مش بالظبط..بس واضح كدا انك عندك مشكله كبيرة
ومخلياك عصبي وعلى اخرك
اه فعلا بنتي تعبانه ..معرفش ليه وزاي لقيتني
بتكلم معاه وبحكيله عن ظروفي ..حط إيده في جيبيه
وطلع 1000 جنيه وقالي خلي دول معاك
انا بففض معاك مش اكتر ..انا لا طالب حسنه ولا بقبل الصدقه ..عن اذنك
أستنى بس انت مين قالك اني بتصدق عليك
اومال دا ايه
اعتبره عربون شغل
شغل ايه ؟
الحق بس اكشف لبنتك واشتري لمراتك هدية حلوه
وهات عشوه جامده كدا وانتوا راجعين
وبكره انا هكلمك
بس انا ممعيش تليفون
هكلمك على تليفون القهوة واقولك ع الشغل
اقتنعت بكلامه لاني كنت محتاج الفلوس بأي شكل وفعلا تاني يوم كان اتصل على تليفون القهوة
قالي انا مستنيك على اول الشارع بعربيتي ، روحت له
وركبت معاه ..قالي أن الشغل المعروض عليك
بأختصار شديد هو انك هتقتل أختي
نعم !! أقتل مين يا عم ..سلامو عليكم
أستنى بس لما تسمع باقي الكلام
مفيش كلام تاني اسمعه ..انت متخيل اني قتال قتله
الموضوع مش كدا
اومال ايه
قالي أن أخته دي هي الوحيده وانها اكبر منه
وبيعتبرها زي والدته ..للاسف هي مش متزوجه
ولا في حد عايش معاها ..اتعرضت لمرض خطير
والدكاترة قالوا انها هتعيش على اقصى تقدير من سنتين ل 3 سنين ..وهو شايف انها بتتعذب كل يوم من المرض
وجسمها وصحتها مبقوش متحملين عذاب العلاج
وبهدلة المستشفيات .
ايوه بس ..
لسه مخلصتش كلامي ..انا عارف انك شايف أن دا جنون
اخ يقتل اخته بس صدقني هي صعبانه عليا جدا
وانا بشوفها بتموت كل يوم 100 مرة بسبب عذابها
الموضوع أشبه بما يسمى القتل الرحيم
هتقتلها عشان ترتاح من عذابها ..ولو حصل
ونفذت المطلوب هتاخد 50 الف ج
سمعت الرقم وريقي جري وحسيت انه يستاهل
المجازفة خصوصا في ظل اوضاع البلد واني
معنديش شغل وانا محتاج
طيب دا مش جريمه ! الموضوع لو اتكشف ممكن اروح فيها
مين قال انها جريمه اصلا ..انت هتحط المخده عليها
وهي نايمه تكتم نفسها وفي دقيقة الموضوع هيخلص
وبما اني اخوها الوحيد فمفيش حد هيشك في انها اتقتلت
وموضوع موتها في اي وقت وارد نظرا لحالتها الصحيه
الموضوع منتهي بس محتاج التنفيذ
طب وطالما هي سهلة اوي كدا ليه انت متنفذش بنفسك ؟
ياريت كنت اقدر مكنتش هتردد لحظة ..بس للاسف
قلبي مش هيطاوعني اعمل كدا مهما أن كان احنا اخوات
التنفيذ هيكون بكرة بعد نص الليل
العنوان فيلا في الرحاب ..انا هوصلك
وانت هتدخل من ع السور ...وبعدها هتدخل من
الباب الخلفي انا هسيبه ليك مفتوح
هي اوضتها في الدور التاني تالت أوضة ع الشمال
تاني يوم وصلت الفيلا ودخلت من الباب الخلفي ..واول ما بقيت جوه الفيلا حسيت برهبه ..انا هقتل ودي حاجه
عمري ما فكرت فيها ..بس دا مش قتل انا هريح
انسانه من عذاب المرض . كنت ببرر لنفسي الجريمه
خصوصا بعد العرض المغري
طلعت فوق ودخلت الأوضة ..الغريبة أن النور كان منور ..مشيت ناحية السرير
رفعت الغطا ولقيتها نايمه كان واضح انها ست مريضة فعلا
عمرها يقارب الخمسين سنه...مسكت المخده
وبأيد مرتعشه قربت منها ولسه هكتم نفسها
الكهربا قطعت ..وقفت مكاني معرفتش أعمل أيه
الدنيا ضلمه كحل ومش شايف حاجه خالص
بعد اقل من 30 ثانية رجعت الكهربا
لكن ملقتش الست مكانها ..لقيت منظر أبشع
هيكل عظمي نايم مكان الست ،اتفزعت ووقعت المخده من إيدي..ازاي دا حصل ..هي الست راحت فين !!
وايه جاب الجثة دي مكانها
بعدها الجثة بدأت أيديها تتحرك ..وسمعت صوت
صرخات مخيفه جايه من كل مكان
النور أنطفى تاني وحل مكانه نور أحمر
باهت، زاد الوضع رعب وتوتر مع وجود دخان
منبعث من جوانب الجدران
محسيتش بنفسي الا وانا بهرب من الأوضة
وسمعت صوت مخيف بيقول
هتهرب على فين ...انت جيت لقدرك برجليك
نزلت جري ع السلم وجيت أخرج
لقيت الباب مقفول ..جريت ع الباب الخلفي اللي جيت منه لقيته اتقفل ..طب ازاي ومين قفله !!
رجعت بسرعه ووقفت في نص الصاله وانا مش عارف اعمل ايه صوت الصراخ والضوء الأحمر والدخان اللي حاجب الرؤية جزئيا ..ايوه الشباك ههرب من الشباك
جريت بسرعه عليه ..شديت الستارة واكتشفت وجود حديد عازل ..كدا أستحالة هخرج ؟
يعني ايه انا اتحبست هنا !
سمعت صوت خطوات ع السلم ..بصيت وشوفت
حد لابس اسود وماسك خنجر بيلمع في الضلمه
وهو بيتوعدني بالأنتقام
جريت بسرعه على أوضة فتحتها لقيتها أوضة مكتب
اول ما فتحت ولسه هدخل اتفاجأت بسرب وطاويط
هجم عليا ..صرخت برعب وخبيت وشي بأيديا
وانا سامع صوت أجنحتهم بترفرف حوالين مني وفوقي
فضلت واقف في مكاني 5 دقايق عدوا عليا ساعات
وبعدها الصوت هدأ بالتدريج فتحت عيوني كانوا أختفوا
دخلت بسرعه وقفلت الباب عليا
لمني سمعت صوت كلب بيلهث في المكان
ألتفت ورايا لقيت كلب ضخم مربوط بسلسلة
اول ما شافني فضل يهوهو بصوت مزعج
السلسة كانت على وشك انها تفلت والكلب
أكيد هيقطعني ..خرجت بسرعه وقفلت ورايا الباب
ولقيت قدام مني الشخص اللي لابس اسود
وهو بيقول انت جاي هنا ايه !
انا ...انا جاي !!
اوعى تكذب انت جاي عشان تقتل صاحبة الفيلا
لا انا
انت لسه هتكدب ..انا عارف عنك كل حاجه
واحب اقولك انك ارتكبت غلطت حياتك لما دخلت هنا
غلطة مش هتلحق تندم عليها لأنك هتموت
معقول كنت هتقتل انسانه بريئة
صدقني أنا كنت متردد بس ظروفي
مفيش ظروف تجبرك تقتل انسانه بريئة
معملتش ليك حاجه ولا أذتك ؟
قرب مني ..لكني دفعته بقوة وجريت
أقرب باب ليا كان جنب السلم فتحته
واول ما دخلت وقعت على درج السلم ..واتدحرجت
لقيت نفسي جوه قبو الفيلا
حسيت بألام في كتفي وركبتي من أثر الوقوع
ولما وقفت لقيت عدد من المانيكانات المتغطية
بقماش على الراس ...فضولي دفعني لرفع الغطا
واول ما رفعت الغطا لقيت دماغ جثة بشرية
شهقت بقوة و رجعت لورا خبطت في مانيكان تاني
رفعت الغطا من عليه لقيت برضو دماغ جثة تانيه
دا مسلخ بشري ولا ايه اللي انا وقعت فيه دا ؟
كل دي جثث وأدمغه واشباح ووطاويط !!
انا فين هنا !!
صوت خطوات ع السلم صاحب الخنجر
جه ورايا وناوي يخلص عليا
انا لازم أهرب ..لقيت شباك القبو مفتوح
طلعت على سلم خشبي بسرعه ونطيت منه
على جنينة الفيلا قبل ما يوصل لي بلحظات
كنت حاسس اني اتكتب لي عمر جديد
بس لما اشوف الراجل الي ورطني في المصيبة دي
انا هخلص عليه
لكنه أختفى زي ما يكون اتبخر
فضلت مستنيه كل يوم ع القهوة ..وبعد اسبوعين
لقيته بيتصل عليا من تليفون القهوة
روحت قابلته واول ما شوفته
لكمته في وشه
طب بس اهدى وانا هفهمك كل حاجه
تفهمني ايه انا كنت هموت في الفيلا الملعونه دي !
الموضوع كله مش حقيقي
يعني ايه !!
انا معنديش اخت اصلا وانت كنت داخل الفيلا بهدف تجربة
تجربة !!
هقولك انا أبراهيم السعيد دكتور علم نفس
اتفقت مع مجموعه من اصدقائي على عمل تجربه
نفسية مع شخص لم يرتكب جريمه في حياته
لكن ظروفه صعبه جدا ..كنا واثقين انك هتقبل بالموضوع
بعد متابعتنا ليك ولظروفك الفترة الأخيرة
لكن كنا محتاجين اكتر نعرف رد فعلك لما نحطك
في جو غامض ومخيف ..هل هتتراجع عن قرارك
وازاي هتتصرف تحت كل الضغوط اللي هتتعرض ليها
الفيلا كانت كلها كاميرات وكل دا كان مرصود ودوناه في ملاحظاتنا ،والست اللي انت شوفتها نايمه دي زميلة معانا مشتركه في التجربة ..وكل اللي انت شوفته
دا كان شغل خدع وجرافيك عالي
الهدف منه انك تصدق كل اللي انت شايفه ..رصدنا ردود افعالك وتصرفاتك،وصدقني افادتنا جدا في البحث اللي شغالين عليه
كنت مش مصدق اللي بسمعه
يعني ايه كل دا حوار وبتشتغلني انت وصحابك !!
احنا اسفين جدا ..بس طمن احنا هنعوضك بمبلغ مالي
نظير مساعدتك لينا والأهم اننا هنساعدك
لحد ما تلاقي شغل مناسب ليك تقدر تصرف منه
على نفسك وأسرتك.
تمت
#القتل_الرحيم
#حماده_هيكل
تعليقات
إرسال تعليق