بعد نص الليل
بعد ما رجعت من سهرة طويلة مع صحابي ..وصلت البيت بعد نص الليل اترميت زي القتيل ع السرير ،
وقبل الفجر بساعه حسيت بباب أوضتي بيتفتح ببطء
غريبة انا عايش لوحدي ..أزاي الباب اتفتح كدا !
مركزتش كتير وكملت نوم ، والصبح صحيت على صوت المنبه عشان أجهز للشغل
كان يوم صعب وطويل وممل ، وخلصت ورجعت
بعد العصر ..طلبت دليفري واتغديت وبعدها
نزلت قابلت واحد صاحبي بعد المغرب ورجعت
البيت الساعه 11
قعدت شوية قدام التليفزيون ،وفضلت أقلب في القنوات
لغاية ما لقيت فيلم أجنبي
بطل الفيلم كان شاب عايش لوحده ..حياته ممله زيي
وتفاصيل يومه شبه بعضها مع مرور الايام
بينام في أوضته ومعاه الكلب بتاعه ، وبالليل وهو نايم
باب أوضته بيتفتح بهدوء من غير ما يحس
بتدخل واحده لابسه لبس اسود وشعرها منكوش
ماسكه في إيدها سكين حاد وبيلمع بتقف جنب منه
بتتأمل ملامحه وشكله وقبل ما يصحى ويفوق
بتختفي وهو بيكمل يومه عادي من غير ما يحس بوجود الخطر داجنبه
لغاية ما ف ليلة الكلب بتاعه يلمح الست دي
واول ما يحاول يهجم عليها بتدبحه وتهرب
بيصحى يلاقي الكلب مقتول ودمه مغرق هدومه
والسرير ..بيتفزع ويكلم الشرطه
وبعد تحقيق ومعاينه وبحث مش بيتوصلوا لحاجه
الشاب في خطر والفيلم شدني جدا
للأسف جات لي مكالمه وانا بتفرج من واحد صاحبي
بيحكي لي عن مشكله مع خطيبته
منا قولتلك قبل كدا البنت دي مش طبيعيه
سيبها وانت الكسبان
صدقني حاولت بس مش قادر
ياعم بلا حب بلا بطيخ خليك زيي كدا
عايش حر طليق..بلاها الخنقة دي
صدقني هي كويسه وطيبة جدا
بس حادثه أنتحار صاحبتها
وخيانة جوزها ليه اللي وصلتها لكدا
خلت خطيبتي تتعب نفسيا وتتقفل من الارتباط
والجواز عموما
انا من رأيي تسيبك منها ..انت اتحملت منها
جنان وعصبية كتير ..وخلاص كل واحد يروح لحاله احسن
للأسف الوقت سرقنا في المكالمه وعلى ما خلصت ورجعت للفيلم لقيته خلص للأسف ..أتقفلت ودخلت انام
قبل الفجر بشوية صوت باب أوضتي مرة تانية اتفتح
معرفش ليه احداث الفيلم جات في دماغي
تظاهرت اني محستش انه اتفتح وكملت نوم عادي
بس بطرف عيني كدا لمحت حد داخل عليا
قلبي أتقبض وكنت هنط من مكاني
بس تمالكت أعصابي
فضل الشخص دا يقرب مني بهدوء وانا سامع خطواته
وهي بتقرب مني وحده وحده
يا ترى دا مين؟
حرامي ولا ايه ؟
وازاي دخل الشقه من غير ما احس كدا
ودي طبعا مش اول مرة ليه واضح طبعا
بس لو حرامي ليه مفيش حاجة أختفت من الشقه !
اسئلة كتيره جت في بالي والخطوات وقفت جنب مني
صوت انفاس سامعها جنبي ...بيتنفس بسرعه
كأنه بينهج
لسه هقوم وافاجأه جرس الموبايل رن ..وصلتني رسالة
الشخص دا جري استخبى ورا ستارة الشباك
قومت من نومي وتظاهرت اني محستش بوجوده
الرساله انقذتني..بصيت فيها
لقيت عرض من شركة الاتصالات
سبت الموبايل وكاني رايح اشرب
دخلت المطبخ ومسكت سكين
ورجعت ع الأوضة ..ولمحت الستارة بتتحرك ..واضح انه لسه وراها
ومستني انام عشان ينفذ اللي جاي عشانه
قربت من الستارة وشديتها مرة واحده بعد ما ولعت النور
واتصدمت لما شوفت خطيبة صاحبي ماسكه سكين
في إيدها وواقفه بتبص لي بغضب شديد
انتي ايه اللي جابك هنا ودخلتي أزاي
أبتسمت وقالت
انت عايز خطيبي يسيبني ويتخلى عني
وبتقول عني مجنونه
لا ..لا طبعا انا ..انا مقولتش كدا
انتي ست العاقلين
انا سمعت مكالمته ليك لاني براقب موبايله
وكل تحركاته زي ما براقبك
وعارفه انك خاين زي جوز صاحبتي
انتوا كلكم خاينين وملكمش امان
ولازم اخلص الناس من شرك
هجمت عليا ولكني قدرت اتفادى ضربتها
ومسكتها بصعوبه واخدت منها السكين
واتصلت بصاحبي وقولتله على اللي حصل
وان خطيبته موجوده في شقتي وحاولت تقتلني
اترجاني مبلغش الشرطة وجه هو واخوها
واعتذرو لي الي حصل منها
وطلبت منهم يحطوها في مصحه لانها بقت خطر
ع كل اللي حوليها
معرفش هي أزاي قدرت تنسخ مفتاح شقتي
جايز اما كنت في الحفله الأخيرة ..مش عارف
بس الاكيد أن الرسالة اللي وصلتني دي
وصحيت بسببها كانت السبب في انقاذي منها
ولا معرفش كان ايه اللي ممكن يحصل لو فضلت نايم
ومحستش بوجودها في شقتي !
تمت
#حماده_هيكل
https://y
تعليقات
إرسال تعليق