الشقة الملعونة
كامله
خبط خبط خبط
بجد مش عارفه أنام ..ايه العالم دي
ناس قليلة الذوق فعلا ..انا مش هينفع أسكت أكتر من كدا
كل يوم بعد نص الليل ..يشتغل صوت الخبط دا
عند جيراني اللي في الدور اللي فوقي
مش فاهمه ولا عارفه ايه سببه
والغريبة أنه مفيش حد من الجيران أشتكى منهم
انا أصلا نومي خفيف وبصحى من أقل صوت
ما بالك بالاصوات المزعجة دي
انا عايشة مع ابني الصغير وجوزي مسافر
قررت أطلع وأخبط عليهم،واعرف منهم ليه بيعملوا كدا
طلعت رنيت الجرس ..محدش رد
رنيت كذا مرة مفيش رد
اضطريت أخبط على الباب ، وبرضو محدش رد!
يعني ايه ناموا ولا مش عايزين يردوا ؟
سمعت صوت باب الشقة المجاورة ليهم بيتفتح
خرج راجل منها ..سألني بأستغراب
خير حضرتك في حاجة ؟
اه اصحاب الشقة دول عديمي الذوق
كل ليلة خبط ورزع وانا مش عارفه أنام بسببهم
فين دا ؟
أزاي حضرتك مش بتسمعهم دول جيرانك !
جيران مين حضرتك ..الشقة دي صاحبها
سافروا من سنه ومفيش حد فيها !
نعم ؟ ..أزاي دا ؟؟
زي ما بقولك كدا ..انتي واثقة أن صوت الخبط
جاي من الشقة دي ؟؟
ايوه طبعا اومال انا بحلم يعني ؟؟
مش عارف بقى ..بس الشقة فاضية
وانا مسمعتش اي صوت صادر منها
من وقت ما سافروا
طيب متشكرة ..واسفه لو ازعجتك
لا أبدا ..تصبحي على خير
نزلت شقتي وانا حاسه بالأحراج والحيرة في نفس الوقت
لو هما سافروا فعلا ومفيش حد في الشقة
ايه مصدر الأصوات دي ؟
ولا هو مفيش صوت اصلا وانا اللي بتخيل
نمت وانا مضايقة واول ما عيني غفلت
رجع من تاني صوت الخبط
وبعدين بقى !! هو اللي بيحصل ؟؟
قررت أطلع تاني ..بس المرة دي
هفتح الشقة واخش
أخدت مفك وقولت انا لازم ادخل الشقة الملعونه
دي واعرف ايه اللي بيحصل جواها..
الفضول كان هيموتني بجد ،ماهو انا مش مجنونه يعني
طلعت فوق واتسحبت بهدوء ووقفت قدام الباب
لسه هحاول أفتحه بالمفك ..لقيته أتفتح مرة واحده
بصيت حوليا وللمفك في إيدي وانا مستغربة !!
وبعدها دخلت
كان في أضاءة خافتة جاية من ناحية أوضة الصالون
حسيت برعشه وأنا خايفه ..وبعدها الباب أتقفل بشويش
رجعت بسرعه عشان ألحقه ..لكني وصلت بعد ما أتقفل
بثانية ..وطبعا رفض يتفتح من جوه
دقات قلبي زادت وسمعت صوت ضحكه مخيفه
جايه من جوا ..وصوت بيقول
في دخيلة وسطنا ...أحضروها بسرعه
باب الصالون أتفتح ..خرج منه ٢ لابسين أسود
ومقنعين ..حاولت أهرب منهم لكنهم مسكوني بالقوة
ودخلوني الأوضة ..كانت في ست واقفه مدياني ضهرها
في دخان بخور كثيف مالي الأوضة وحاجب الرؤية جزئيا
الست واقفه ولابسه عباية وشعرها منكوش
قالت من غير ما تلتفت ليا
واضح انك شجاعه فعلا ..او غبية !!
فضولك حركك عشان تكتشفي شئ مش من حقك تكشفيه
خلع الاتنين الواقفين قناعهم ..وقال واحد منهم
هي دي الست اللي تحتنا ..سمعت الصوت وجات تعرف في ايه ..وفضلت ترن الجرس وتخبط عاوزه تكشف أمرنا
بصيت ليه ودققت أكتر ..واتصدمت لما عرفت انه
الراجل اللي كان في الشقة المجاورة وفتح لي من شوية
وقالي مفيش حد هنا
انت !!
ايوه انا ..عايزه ايه وليه مسمعتيش الكلام
انتوا مين وبتعملوا هنا ايه ؟
التفتت الست وبصت لي بغضب
والراجلين نزلوا على ركبتهم واحنوا رقابهم ليها
كنوع من التقدير والتعظيم
احنا اصحاب الشقة دي ..ونعمل أمور تخلينا
نتواصل مع العالم الاخر
ليه ايه الهدف ؟؟
انا هريحك واقولك ..دا بس عشان
انتي لا يمكن تقولي لحد حاجة من اللي هتعرفيه
او شوفتيه
في مصالح بتم مع بعض الناس واحنا بنساعدهم في قضاء مصالحهم عن طريق العالم الاخر والجن السفلي
قصدك بتعملي أعمال !!
تقريبا
تخربي بيوت ناس وبتدمري علاقات
وبتسببي في أذى اي حد ..والمقابل الفلوس
احنا أسباب لا بنضر ولا بننفع ..وبعدين انتي غلباوية ليه كدا !
انا هفضحكم
مش هيطلع عليكي النهار عشان تفضحينا
هتقتلوني !!
مش بالمعني المفهوم ..لكن احنا هنقدمك
قربان في أقرب وقت
خدوها على جوا
اوعى كدا ..سيوني
شدوني واخدوني لاوضة تانية بالقوة
ولما دخلت كانت مليانه جماجم وعضم لحيوانات
مقتولة ومتحللة وفي منها لسه في مرحلة التعفن
واحد منهم قال
الحيوانات دي كانت قرابين..واحنا مش بنستخدم
البشر كقربان الا في حالات نادرة
متقلقيش دورك جاي ..وقريب جدا
والتاني قال
متحاوليش تصرخي او تزعقي ..مفيش حد هيسمعك
ولا هيقدر ينجدك مننا
انتوا سفلة وولاد ستين كلب
فضلت أصرخ واعيط ورموني ع الأرض
وقفوا الباب ومشيوا
كنت هموت من الخوف ..انا بغبائي وقعت نفسي
في الورطه دي مكنش لازم اسيب فضولي
يدفعني أرمي نفسي للهلاك
بعد تعب من الصراخ والعياط
قولت لازم أهدى ..وافكر في طريقة
تخلصني من الورطة دي
سمعت صوت قطه جاي من مكان في الأوضة
الدنيا كانت ضلمه ..لكني قدرت اتحسس
ومشيت ناحية الصوت ..كان في صندوق
حابسين جواه قطه مسكينه..واضح انها لغرض القرابين
بتاعتهم ..فكرت ممكن اتصرف ازاي
بعد ساعه فضلت أزعق واطلب منهم
يجيبولي مايه ..هموت من العطش
سمعت صوت واحد منهم بيقول
روح ياعم وديلها تشرب ..احسن تموت
احنا عايزينها حية لغاية بكرة بالكتير
دخل الراجل ..وفجأة رميت عليه القطه
اللي خربشت وشه ونزف بسببها
زقها بأيده وهو بيشتم ..جه الراجل التاني
ودخل يشوف زميلة ..فاجأته بالمفك اللي كان في جيبي
وغرسته بيه في عينه
وفضل يصرخ زي المجنون
حاوطت التاني بدراعي ..وحطيت المفك
على رقبته ..وطلبت منه يفتح باب الشقه بسرعه
بالفعل فتح الباب وخرجت وفضلت أصرخ واصوت
واتلم كل سكان العمارة وطلبنا الشرطه
الغريبة أن الست كانت أختفت من الشقه
رغم اني كنت واثقه انها مهربتش وكانت لسه جوه
توقعت انه في باب سري مؤدي للشقة المجاورة ليهم
وبالفعل تم اقتحام الشقه واتقبض عليها منها
وتوجه ليهم تهمة ممارسة الدجل والشعوذة
وقتل حيوانات بهدف السحر
ومحاولة خطف وقتل انثى.
تمت
#الشقة_الملعونة
#حماده_هيكل
لايك وشير لو القصة عجبتكم..دعمكم مهم ليا 💙
تعليقات
إرسال تعليق